حزيران (يونيو) ٢٠١٩، سوشال ستوديو بيختار تطبيق دروب ليكون تطبيق الشهر الفلسطيني..
دروب
خريطة تفاعلية تتجوّلوا فيها فلسطين بكل ثقة!
نظام الملاحة (GPS) دروب هو تطبيق طورته شركة آيديال المختصة بالخرائط والحلول المتعلقة بالمواقع.
عن طريق إستخدام تطبيق دروب رح تقدروا تلاقوا أي موقع في فلسطين وتحصلوا على تعليمات السفر والإرشادات على الطريق.
دروب بيسمح للمستخدمين يتجولوا فلسطين بكل دقة، من خلال خريطة بيتم تحديثها مباشرة، حتى توفروا الوقت وتخططوا بشكل أفضل لمشاوريكم ورحلاتكم.
دروب، نظام الملاحة للمناطق الفلسطينية
تطبيق دروب بيخلق شبكة من الناس اللي بيبلغوا عن حالة الطريق لحظياً وباستمرار، لهيك فيكم تعرفوا أي أفضل طريق تسلكوها وتكون خالية من المشاكل والعوائق.
بيمكّنكم التطبيق من إنكم تضيفوا أنفسكم على الخارطة، وأصحاب العمل يحددوا مواقعهم،فيكم كمان تحددوا أماكنكم المفضلة حتى تخططوا لمساراتكم وسفراتكم.
عمليات الإدخال من المستخدمين بتساعد بتحسين خرائط الطرق وتحديثها بشكل مستمر، وهيك بيتم التغلب على الخرائط من التطبيقات العالمية اللي فشلت بالتخصص بمناطقنا الفلسطينية.
مسؤولية وثقة عالية
فريق دروب بيتعامل مع البلاغات والإشعارات بشكلين مختلفين، عشان يضمنوا أفضل تجربة تجوّل باستخدام خرائطهم.
الشكل الأول: البلاغات المتعلقة بدقة ال Mapping، وهاي البلاغات اللي بتحكي عن تغيّر اتجاهات الطرق أو غيرها من المشاكل المتعلقة بالربط الواقعي ما بين خريطة دروب والطريق الحقيقي. فريق دروب بيتعامل مع هذي التبليغات بشكل مباشر وبيتحقق من المعلومات المزوّدة، حتى يحدّث خرائطه.
الشكل الثاني: بلاغات حالة الطرق من حوادث وعراقيل وأية أزمات موجودة، وهاي بتعتمد على المسؤولية الاجتماعية من المستخدمين، مجرد ما المستخدم الأول يبلّغ عن حالة أمامه في الطريق، بقية مستخدمي التطبيق بيقدروا يصادقوا على البلاغ بـ Like حتى يتم التأكيد بشكل جماعي.
تجربة فلسطينية، 100%
تطبيق دروب بياخد بعين الاعتبار خصوصية الظرف الفلسطيني أفضل من أي تطبيق ملاحة ثاني، بواقع خبرة أفراد من الطاقم الطويلة بمجال الخرائط في فلسطين.
هاي الخصوصية بتقدروا تلمسوها أول شيء بأسماء الشوارع، رح تلاحظوا إنه المعالم والأماكن والشوارع مسجلة على خارطة تطبيق دروب بمسمياتها الفلسطينية العربية الشائعة.
ثاني مكان بتلمسوا فيه خصوصية هذا التطبيق هي الطرق الواصلة بين المدن، مستحيل أبداً التطبيق ياخدكم من طريق غير مصرّح إلنا كفلسطينيين من الكيان الصهيوني من دخوله، ولا رح يقترح عليكم طريق بيمر من مستوطنة وبيشكل خطر على الحياة.
حتى بإمكان المستخدم يغيّر هويته من هوية الضفة الغربية لهوية القدس، والتطبيق رح يفهم تغيّر حاجاته، وبهيك بيقدر يميّز أي إرشادات طريق يزود المستخدم فيها، لو حابين تعبروا من قلنديا مثلاً وإنتوا من القدس، أو لو مش بمقدوركم تعبروا من قلنديا، فالتطبيق بيطرحلكم طريق التفافية.
أكثر من مجرد تطبيق ملاحة؟
من خلال تواصلنا مع المدير التنفيذي لمشروع دروب، السيد: محمد عبد الحليم، صرح بشكل حصري لحقيقة إنه التطبيق في مرحلة تقديمه وتبنّيه من الدفاع المدني الفلسطيني، وهيك المواطن الفلسطيني رح يقدر يطلب النجدة والإسعاف وأي خدمات مدنية مباشرة من التطبيق، والحلو بالموضوع إنه الطرف اللي بيجاوب على المواطن رح يكون معه موقع الطوارئ بدقة عالية من خلال خريطة دروب، وبهيك المواطن الفلسطيني رح يتفادى أية تفاقمات بمشاكله ممكن يتسبب فيها التأخر بالوقت من سيارة نجدة ما قدرت تحدد مكانه صح.

بداية واثقة وطريق طويل
دروب حقق رقم قياسي بإنطلاقه ووصل لمرحلة يبقى من الأكثر رواجاً “Trending”، في أسابيع قليلة جداً وصل لأكثر من 10.000 مستخدم للتطبيق ما بين منصة جوجل وآبل. بواقع 12.000 تحميل للتطبيق حتى لحظة كتابة هذا المقال و6000 مستخدم نشط بالمتوسط.
خرائط التطبيق اللي بيعتمدها هي خرائط فلسطين التاريخية، وبالرغم من إنه انطلاقة التطبيق حالياً محصورة بمناطق وخرائط الضفة الغربية إلا إنه التوسع في غزة والمناطق المحتلة 48 مخطط إله، هاد الكلام مش معناه إنه التطبيق غير قابل للاستخدام في غزة، لكن رح يكون ينقصه بعض المزايا الموجودة في مرحلة التجربة الحالية في الضفة الغربية.